دردشات فى الفيس بوك

اهلى الزينين ماكو طيبين

صحينا علي زمن تاني
زمن و الله جد ممحوق ..
و لا زول بفقد التاني
و لا فيهو الفرح ملحوق ..
زمن نسّانا رابط الدم
دخلنا عليهو قلنا نروق ..
لقيناهو ديمه زايد الهم
ببيع حتى الضمير في السوق ..
زمن ممحوق ..
زمان كان الوطن أنضر
و كان كل العشم تربال ..
يلبسو توب ربيع أخضر
و يستر بالقليل الحال ..
زمان كان كل زول راضي
و أقصى مناهو لقمه حلال ..
و هسع يا زمن فاضي
بقيت ما بتفهم إلا المال ..؟
زمن ملعون ..
زمن محتال ..
مبشتن و شين ..
تقابلو تغشك البسمات
تفارقو تشوفو بي وشين ..
حليل يابا و حليل يمه
و حليل زمناً علينا حنين ..
حليل حبوبه سقتها وين ..
عيونا مراية القمرا
و دموعا بتروي عطش الطين ..
قليبا الطيب الدفاي
وشيشا الما بتشوفو حزين ..
و صوتا كما انسياب الناي
حليلا الديمه ماليه العين ..
هيا الزمن العلينا أقيف
دحين قول لينا واصل وين ..؟
حليل اللمه و الجيران
تشوفنا علي البيوت خاشين ..
بنفرح ديمه بالضيفان
نقيف ننده علي الغايبين ..
نقاسم اللقمه رغم الجوع
مع الفي الدنيا حظو ضنين ..
نقشقش من عيونو دموع
و كنا بلا قروش عايشين ..
و مبسوطين ..
منو القال السعاده قروش
شنو الخلانا ناس تانيين ..
أخيرلينا ننستر يا ناس
قبل ميعاد رحيلنا يحين ..
نسمي و نطرد الوسواس
و لا نشيل هم نجيب من وين ..
نساند كل زول محتاج
نمد اللقمه للمسكين ..
نكون في الحاره جد أخوان
نقضي حياتنا متصافيين ..
نعبي قلوبنا بالإيمان
أخيرلينا من نعيش ميتين ..
خلاص كمل الكلام و القول
و عذراً لو كلامي حزين ..
حلاوة الدنيا طيبة الزول
و الف سلام علي الطيبين

[ltr]ام سلمة
ام سلمه عوض الله ام خطيبا سعودي
قام بيها قومة حودي
انا شاعر موزون بتكلم فوق حدودي
ام سلمة ذاتا من نسبة اعمامي و جدودي[/ltr]

[ltr]Top of Form[/ltr]

[ltr]Bottom of Form[/ltr]

ولا تهتم يا يابا
ولا يهمك كتير يابا
بناكلا كسره بي مويه
وبنحمد ربنا الجابا
وهي زاتا كتيره اصلا جات
قبيلك ما حلمنابا
مدام العيش في ما بِنْجُوع
ودي المقسومه نرضابا
وسُعًاد والله في جنبك
جُرُعْة المويه نهنابا
دحين لا تزعل آيابا
بتتذكّر زمان يابا
بنتقلْقل من البندر
عشان في الحله نَقْضي العيد
ونفرح يا با حد الفرحه
ما تلحق دروبا تصيد
ونتوكل علي الحله
ونسافر في طريقا بعيد
وناصَلْ مهرجان اعياد
أحس الفرحه صوتا يزيد
ونلقى الحله راجيه نجي
سرامْس الشاي
قعاد الضل
فرح حبوبه بالجيه
وبِدْخُلو ناس وبِمْرُقو ناس
كتار بالحيل و ماشويه
وترَضّي منو وتخلي منو
هو دا يقول ليك تعال لا جاي
ودا يقول ليك تعال لا جاي
هدا الويكاب
ودي امْ تَكَشُو
وهدي الكِسره
وهدي الشيه
وهنا الحروم
ونَسْة البن
رمي الودعات
بنية الصرّه والويحيد
واجِبْدي عليكي دي الطيه
وتحتار انت تاكل كيف

قبيل جوك سبعه نفس الحال
وقدّامك كتار آيابا
مُرْضاتُن دروبا طوال
ويبقى الحال هو ياهو الحال
شِجَرة الضل
وريحة الفل
ويبقى الكل أهل طيبين
بِسُتْرو الحاله
كان بقّ الزمن نيران
وتقابة الفكي امْحُمد
ضيوف الخلوه والحيران
وصوتك يابا لامن تقرا
لما ترتل القرآن
وكضاب البقول بحبس دموعو حداك
ملان شيطان

صباح العيد يجو الشفّع
ونحن الدهشه ما خالانا نفهم حاجه حتى الآن
بسوقونا الصلاه ونمرق
نبارك العيد علي الجيران
تصحح انت معلوماتنا
ديلا أهلنا ما جيران
هناك حبوبه أسكت ساي
دي فرحانابنا يايابا ومسويه فوقنا كم دوباي
بجيبو عليها عيديه
وتشيل وتلم
وبستغرب
دا كلو دحين بياكلو منو
أتاري بلمو في صندوق
بجو الحِبّان يخشو الدار
وكل زول خشّ لازم يضوق
وامي الولَّعت صاجا
ومع المعراكه والطايوق
وأولاد عمي من يوم داكا
شالو قروش وفاتو السوق
دا كلو تمام
ولكن ما هو الصندوق
وجاطت فيني حبوبه
ها دي السحّاره
واتعجّبْ كتير يا يابا
فجأه سمعت صوت طمباره
فرحة عيد مبادي بشاره
بالعرس القريب بالحيل
وكل الناس تقوم تتجاري
أو تتبارى
ترقص في غنا الطبماره
يا حبوبه
مالك لابسه ليك سلسل طويل وجِلِدْ
دي يا المبروكه مُفْحَضْتِي
وهناك الجو ولا هو سخانه لا هو برد
تقول حبوبه جدك يا السميحه وِلِدْ
وِلِدْ راجلا بخود الحارّه ساعة الحارّه نارا تلد
أبوك يا بنيّه
واسكت ساي
واهبّش مفحضة حبّوبه
كان ألقالي فيها قروش
أشيل ميتين
واجِر بره
والاقي البيت غزوهو جيوش
يفضُّو الحوش
ويملو الحوش
كأنو تقولو لمو الدنيا
ناس نبته وحضارة كوش
سعف حبوبه كان منكوش
قطن حبوبه كان منفوش
وأقول أفزع مع البنوت
وتحلف أمي بي أيمانا
بتها ما ها زي غيرا
أحنّس أبويا دايره أرد
أرد بالسرقه من أمي
وأسك عربية السيره
وتشيل حبوبه جركانتي السغْيره
تديرا فوق زيرا
وتقول أنا اكتشفت الذره
يبقى وُرودي هو السيره
وأبويا يقول حصاد العيش
ونقعد لي حصاد العيش
ونركب كارّو للحواشه
لازم نمشي من مافيش
ونمشي نشوف حصاد العيش
وكان يوم امتحن في زرعو
واثقه تمام بكون الطيش
وناكل لقمه بي ملحايه
طاااعمه
وما بِتَطْعَمْ لييش ؟
إذا كانت سواة حبوبه
وكتين ولّعت حطباته
عاستا بره في الراكوبه
كوجنت العجين في الصاج
وقَضّت بي سراع الحوبه
وَدّتا عاشه بت الخير
ولِي منبوذه لِي معيوبه
نفس الحاله ها يابا
باكر يجي الدرت يا بوي
وتملا هدومنا بُتّابه
ومقسم بي يمين الدنيا
كان غرتنا كضابه
قّدُرْ ما ادّتنا أدتنا
ولا في يوم سرحنا با
وباكر يجي الدرت يا بوي
ولا هامّينا عسر الحال
ومهما طال ضلام الليل
صباحو بجيهو مهما طال
ولا خاب العشم يا يابا
لا خيّب إلهنا سؤال
ولا فارق هواك الروح
ولا كسر احتمالي محال
وحاجه ام سلمه لا كلت
ولا صاب اصطبارا زوال
ولا ملّينا عسر الحاله
لسه عشمنا فاتح فال
ولا تهتم يا يابا